'n Afrikaanse blog oor kwiltwerk in al sy fasette.
Hier deel ek my kennis, liefde en passie vir my werk met mede kwilters.

Tuesday, August 13, 2013

Love Entwined

Ek is saam met 'n hele klomp kwilters op 'n reis. Ons maak 'n kwilt wat Esther Aliu ontwerp het en gebaseer is op 'n historiese kwilt  (eintlik 'n "coverlet") Vir my, wat hoofsaaklik met die masjien werk (alhoewel ek ook elke jaar 'n kwilt met die handlas) is so 'n handappliek kwilt werklik 'n uitdaging. Hierdie kwilt word as 'n BOM beskikbaar gestel, maar mens moet aansluit by die Yahoo groep. In hierdie groep is daar baie kundigheid en die kwilters plaas ook tutoriale op hulle blogs oor hoe hulle die uitdagings aan pak.

Ek kan 'n mooi onsigbare applieksteek maak. Ek kan goed "needle turn" doen. Ek sukkel met die vooraf voorbereiding wat sommige appliek ontwerpe vereis. Ek haat gom. Die strykyster en stysel is my tegniek van keuse, maar ek brand met die groot strykyster en die kleintjie wil nie warm genoeg word nie.

My grootste probleem is om die appliek stukkie op sy plek te kry. Ek gebruik die "overlay" tegniek, maar dit werk nie in alle gevalle nie. Ek is egter bereid om die uitdaging te aanvaar, maar soos gewoonlik moet ek my eie stempel hierop afdruk. Gelukkig gee Esther aan ons daardie vryheid om haar patroon op ons eie manier te interpeteer.

Die kwilt begin met 'n kompass en is so reg in my kraal. Ek het al baie gemaak, maar nog nie een waar die agtergrond so verskil en in pantjies verdeel is nie. Ek weet al dat die materiaal keuse in 'n kompas dit kan maak of breek. Die agterste puntjies (kleintjies) moet dowwer word, maar die uitdaging is dat elke "laag" puntjies steeds sal uit staan. Nou is daar nog die agtergrond wat ook kompeteer vir aandag.
Links is die "foutiewe" kompas

Met my eerste kompas voltooi is dit duidelik dat die agtergrond te donker is en die aandag van die kompas aftrek. Ook vloei die kleur van die kleinste puntjies en die punte voor dit in mekaar en kan jy dit byna nie onderskei nie. 'n Tweede keuse word gemaak en die kompas word weer gestik. Ek gebruik die Freezer papier metode van Judy Mathieson. Die pante word opdie gemerkte  freezer papier gestryk. Dan vou ek die papier weg en stik met die vou as gids. Die pant word dan weer op die papier gestryk en die volgende deel weg gevou. Op die manier word nie deur die papier gestik nie en kan die papier maklik verwyder word. Die vasstryk op die papier verleen stabiliteit en maak dit moontlik om die skerp puntjies akkuraat te kry.

Tog is daar hier en daar 'n punt wat nie presies reg is nie en toe ek die ring appliek moet ek hiervoor voorsiening maak. Appliekwerk vergewe sekere foute moeilik. 'n Ronde sirkel wat nie presies rond is nie is baie opsigtelik. Op die sirkel rand moet 'n klomp klein sirkeltjie appliek word. Ek weet nou al- dit moet maar wag tot later. Dalk kies ek ook knope of "sequins" as uitweg. As die sirkeltjies nie presies is nie gaan dit die hele voorkoms bederf.

Ek kry drie mooi stukke Indonesiese lap by die Bloemfontein fees by Leslie Pahl se stalletjie. Ek sien onmiddelik dat ek hierdie appliek uitdaging kan vereenvoudig met Broderie Perse. Ek sal van hierdie gedrukte blomme gebruik in plaas daarvan om al die klein appliek werkies met baie deeltjies te maak. Jy kan dit as "cheat" beskou- vir my is dit die ideale oplossing vir 'n onervare appliek kwilter. Dalk bemeester ek die kuns van appliek beter as ek 'n makliker uitweg kan volg.

Rondom die kompas wyk ek af van die patroon. Ek appliek 'n reguit kabeltjie. Ek vou die binnerand in waar die kabel vleg sodat 'n reguit strook materiaal nou in 'n sirkel appliek kan word. Ek wys die half gewerkte projek vir my kwilt vriendinne. Hulle sien dadelik dat die deel wat ek nog moet vas werk nader aan die kompas sal wees. Rita voel ek moet uittrek. Ai ek het dan so mooi die buite ring gemerk. Dit is nou presies die uitdagings van appliek werk wat ek nog nie bemeester het nie. As ek dit vas gewerk het- is dit nie op die regte plek nie. Die probleem is dit: Ek moet dit nou op 'n groter ronding pas en sal dit nie kan inpas nie- ek gaan 'n kwart kabel kort. So dit moet maar so bly. Iemand stel voor dat ek net meer van die naattoelating invou sodat die opening wat die agtergrond blootstel korrek is.

Nou skuif ek dit eers bietjie op die agtergrond, maar nie vir lank nie want ek is ver agter en die derde deel is die 15 de op die Yahoo groep beskikbaar. Julle moet spring as julle wil deel neem. Wanneer die nuwe instruksies verskyn word die vorige twee dele af gehaal. Dit is dan teen betaling beskikbaar in Esther se Etsy winkel.

Besoek gerus haar blog en verlustig julle in hierdie meesterstuk.

Alles wat mooi is
Marié

Monday, April 15, 2013

Handlas in Bloem

Mense is dikwels verbaas om te sien dat ek, 'n masjien kwilter, hand laswerk doen. As ek hulle dan vertel dat ek omtrent 1 kwilt per jaar met die hand maak is hulle nog meer verbaas. Hand laswerk is baie "vervoerbaar". Ek het baie oninteressante dae langs my kinders se netbal bane met my laswerk verwyl.

Die wonderlike is ook dat herinneringe aan die verskillende projekte vas geknoop is. As ek na my Liberty projek kyk onthou ek die paar dae in Mainz. Ek was op 'n wyn skou om ons wyn (Middelpos) te probeer verkoop. Ek het bietjie gaan stap en niks vermoedend langs die moderne hoofweg af gestap. Ek is by 'n groot afdelings winkel in om wol onderklere te gaan soek. Toe ek by die winkel se agterdeur uitloop was dit soos om in 'n ander wêreld te beland. Ek het regtig soos Alice in Wonderland gevoel.

Hier was keisteen straatjies met ou wêreldse winkeltjies. Vol verwondering het ek in die straatjie gestap en alles in gedrink. Toe ek daarna in my hotel kamer aan my hand projek werk het ek hierdie verwondering vir ewig in die kwilt vas gewerk.

Ek vertel in my Engelse blog hoe ek 'n vinnige handlas metode ontwikkel het. (Regs kliek op die verligte woorde en kliek op "Open in a new tab". Dan kan u daar meer lees en weer terug kom na hierdie skrywe).

Tydens Bloemfontein se Nasionale Fees bied ek op 3 Julie 'n handlas klas aan. In die klas gaan die vinnige handlas metode toegepas word om 'n Feathered Star te maak. 'n Ster met die hand is maklik. Wanneer dit met die masjien gemaak word moet mens die Y nate afsonderlik stik wat tydrowend is. (Mens stik eers, speld dan die volgende naat in posisie en stik dit dan vas) Met handwerk werk mens net die een sy vas, herposisioneer vir die volgende sy en gaan aan om die sy vas te werk.

As 'n mens sulke klein driehoekies moet vas werk behels masjien werk dat mens noukeurig moet speld om te verseker dat die hoekies mooi skerp is. Aangesien die puntjie dikwels deur 'n naattoelating toe gevou word kan mens foute maak en moet jy uittrek en weer oor speld. Met handwerk speld jy ook, maar jy sit in 'n gerieflike stoel (as jy by jou huis aan jou handprojekte werk) en vou die naattoelatings weg om presies korrek te kan werk- so geen uittrek is nodig nie.

Daar is 'n plek vir hand en masjien werk. Ongelukkig het baie kwilters se handlaswerk by heksagone begin en geeindig. Appliekwerk word dikwels met die hand gedoen en die handwerk entoesiaste kan gerus die vaardigheid om met die hand te las ook aan leer.

Ek wil graag my vinnige metode wat handwerk bespoedig, met julle deel. Die metode behels dat eers net die een stel lappies gemerk word. Die patroonplaat word dan na die eerste sy vas gewerk is, op die naatjie van die ander lappie geplaas om die ander sye te merk. Laspante word ook eers agterna los gesny wat die verlore raak van laspantjies beperk. (Ek noem my metode LAS- EERS-SNY-DAN.) Wanneer die individuele pante gesny word, word die rolsnyer gebruik en word 2 lae gelyktydig gesny. Dit is alles dinge wat die handlaswerk bespoedig en dit moontlik maak om kwilts vinniger met die hand te las. (Vinniger werk se voordeel is dat jy meer kwilts in dieselfde tyd kan maak- ons kry nie meer tyd nie en moet die tyd wat ons het effektief benut)
Tydens die Fynbos Wegbreek in Riebeek Kasteel het 14 entoesiastiese kwilters hierdie muurbehangsel aan gepak. As jy 'n nuwe vaardigheid wil leer en hand laswerk deel van jou repertoire wil maak, dan sien ek jou op 3 Julie in Bloemfontein.





Sunday, March 10, 2013

Moderne Kwilts

Ek was 'n bietjie awesig van my blog, maar is met nuwe voornemens gereed om weer bietjie hier te skryf. Ek is lekker besig met allerhande projekte. Aan die einde van die maand gee ek klas by Dot's Quilts met die tema "Moderne Kwilts". Dorothy is mal oor moderne lappe en haar winkel het 'n wye verskeidenheid van hierdie soort materiale.

Kwilters wat in hierdie genre werk sê dit is moeilik om die moderne kwilt in woorde vas te pen, maar as jy dit sien, sal jy dit erken. Daar het al heelwat boeke oor die onderwerp verskyn en nou is daar ook 'n tydskrif wat hieraan gewy word, beskikbaar. Quiltcon is van 21-24 Februarie in Austin Texas deur die Modern Quilt Guild aangebied.

Alhoewel baie moderne kwilters kunskwilts maak, is daar net soveel wat kwilts maak om gebruik te word en as "binneversierings" items gebruik word om by te dra tot die dekor van 'n huis. Moderne materiale het dikwels groot motiewe in verskillende kleure gedruk. Die kleure is vars helder kleure sonder grys of bruin wat in die kleur vermeng is. (Daar is natuurlik ook uitsonderings) Die materiale word dikwels met wit materiaal gekombineer om 'n sterk kontras te vorm. Die kwilt ontwerp is eenvoudge las pante soos vierkante of reghoeke. Daar word nie tipiese blokke soos byvoorbeeld sterre gemaak nie. Weer eens is daar ook uitsonderings en dit is nie te sê dat mens dit nie kan doen nie.

Hier is 'n baie mooi Dear Jane kwilt wat met Kaffe Fasset materiale gemaak is.

Vir hierdie klas gaan hierdie kwilt met die "octagon" of Melon Patch blokke gemaak word. Die sukses van die kwilt word bepaal deur die materiaal kombinasies. Daar is ook 'n paar kleiner dingetjies waarna mens moet oplet. Die patroonplaat vir die Oktagon kan maklik verkeerd op die materiaal neer gesit word en dan word die pante nie korrek gesny nie. Die driehoeke moet ook aan die skuinssye vas gewerk word en nie op die sye wat op die draadrigting gesny is nie- dit sal verkeerde resultate gee.

Hierdie maklike kwilt bied aan mens die geleentheid om "mindful" te werk. Wanneer mens op iets konsentreer word verbindings in die brein gevorm. Dit help om die brein te verjong. So wanneer jy met jou laslapwerk doenig is, raak daarin verdiep en konsentreer daarop- slaan die dwalende gedagtes hok, vir 'n nuwe brein.

Alles wat mooi is vir 'n jong vars brein

Marié